Tuesday, October 23, 2007

جاتنـــــــــــــــــــــــا القرف

ما رأيته عند " مراقب مصري " من تعليقات حاجه تفرح بصحيح وتخليك تثبت علي الطريق وتشتغل وانت مطّمن ان وراك بني ادمين هتيجي في ساعة رضا وتدعي لك بظهر الغيب علي الاقل مش هتلعن سلسفين أهلك وتقعد تشتغل في جسدك وقلمك تقطع فيه بالكيلو ، يا اخي دا انا كانت محاشمي _لامؤاخذه _ وارمه من بعض المدونين وبالرغم من كده خرست وبيني وبين نفسي قلت ما اقترفوه لا يرقي لأن يجعل الواحد يشمت في الظلم اللي وقع عليهم ، بعدين حاجه لطيفه جدا ان احنا نقعد نجعر يوميا علي اننا مسلوبين الحريه وان احنا بيمارس علينا الاضطهاد ومش عارفين ناخد لا حق ولا باطل وتهمتنا اننا موضوعيون ونقول الحق ، وفي الحقيقه احنا شوية لا لاقيين شغل ولا مشغله وكل نفر أقصي طموحه انه يتحط له بانر باسمه في المدونات " فري اسم النبي حارسه وصاينه " او يعملوا معاه لقاء مصور وسحنته تهب علي الساده المشاهدين يعني من الاخر لا بنكتب لوجه الله ولا بنكتب حتي عن اقتناع ، الله !! طيب بنعايب ليه ونقعد نسلخ في الكتاب بتوع الحكومه والا علي الأقل دول بياخدوا فلوس يعني أكيلة عيش ، انت بقي ولا انا يا اللي حيا الله بتنفس عن اللي جواك ايه عذرك ؟

واحد كتب عن أمن الدوله بيقول بكل بساطه زي ما بتراقبونا هنراقبكم ، كانون ايه يا اخوانا يا اللي بتقولوا قانون ؟ هو كل واحد خط له شنب في وشه وعمل له مدونه هيشتغل قانونجي ؟ انا لا هقول انا مع صاحب مدونة " لسان القلم " في حقه الطبيعي انه يكتب اللي كتبه ولا كنت هاطالب بأننا نقف جنبه وعلشان ايه وليه هقول بكل صراحه _ والكلام موجه لنفسي قبل اي حد " اولا اتضامنا ما اتضامناش لا هيجيب ولا هيودي انا بقي بكررها وبقولها لأي صديق أو عدو يعمل الشويتين بتوعه عليا احنا في حاره ضلمه لا هينفع تعيط ولا تصرخ ولا تضرب علشان تطلع منها عايز تطلع اطلع بنفسك يعني هتقف محتج علي العتمه وحياتك هتقف لحد ما تموت ولو حاطط في مخك انك بشوية واقفين بكشافات بره الحاره هيطلعوك تبقا غلطان

لو واحد حاطط في دماغه انه وقوفنا بيفط في مدوناتنا طلّع واحد معتقل او خد حق واحد مظلوم تسمحلي بقا انغملك مقطوعة من " أنف وثلاث حلوق " . المهم في كل الموضوع دا بقا اللي دخل قرا موضوع " مراقب مصري " وساب لنا روثه _ معلش أصل الخراء بتاع البني أدمين فقط _ يقولك اصله اخواني يبقا الاخوان أولي بيه وكأن عبد الرحمن دا واحده جوزها غبنها يبقا بيت ابوها أولي بيها ، واللي يقولك وتحس من كلامه انه يا مسكين زوره محشوره فيه قتايه " ما وقفنا مع منعم خدنا ايه ؟ " طيب وقفت ليه يا عم هو جديد عليك يعني انك تقف وما تاخدش حاجه ؟ ماهو طول عمرك بتاخد فيها !! طيب ما فيه فكره حلوه ومطروحه للنقاش نقسم اللي بيكتبوا أنواع يبقا دكوره ونتايات ولو طلعونا بتوع حقوق الحريم نعيد حساباتنا ونقسمها صعايده وبحاروه ولما نلاقي اخوانا الصعايده قلبوها خناقة بالشوم نجيب من الاخر خالص بقا وتبقا مسلمين ونصاري وكل فرد يحط له علامه تميزه اللي يحط صليب شغال واللي يحط هلال وماله واللي أكيد هيفقع مرارتنا ويحط هلال وصليب هيبقا موجود معانا . والله انا عايز اكتب بس قرفان ، انا هقول علي حادثه شخصيه ومن قريب لما كنا بنتابع حالات الناس اللي اتعذبت في اقسام الشرطه واحد من الأهالي خدني علي جنب وقالي علي حاجه للأسف ما كانش ينفع تتنشر او ما كانش عندي شجاعه كافيه اقولها علشان قال ايه ما احبطش الناس اللي بتشتغل والمفروض بنشتغل لوجه الله وقبل ما نحصل الناس دي وما نلاقيش ناس تشتغل علشانا الراجل بيقولي وبكل هدوء " يا بيه انتوا متشكرين بس في الاخر كل واحد فيكم هيروّح بيته ولأهله واللي في الهم في الهم " كل واحد بيقولك دافعت ووقفت جنب فلان الفلاني واللي بيقولك اصله مش عارف ماله فهو حر حتي لو سيادته عمل اللي ما يتعملش وكتب وقال انا متضامن مع علان العلاني هيعمل كده وهو معاه كوباية النسكافيه بتاعته ومولع سيجارته ومستريح بحريته في انه يقوم من علي الكمبيوتر بتاعه وياخد شاور ويتبرفن ويحضّر نفسه وينزل يقف _ لامؤاخذه _ في وقفه احتجاجيه واللي في الهم هيفضل في الهم وجاتنا كلنا القرف

10 comments:

noraamahdy said...

مش قول غير فعلا جاتنا القرف

عبدالرحمن فارس said...

الرائعون كالأحجار الكريمه لا نصنعهم ولكن نبحث عنهم لنهنئهم بالعام الجديد ... كل عام وأنتم بخير
عام مضى وعام يأتي ويارب السنه دي تكون أحسن من الي قبليها ونشوف نفسنا و مصر أحسن .... بدري بدري كده قبل الزحمه

appy said...

على فكرة انت جبت من الاخر انا اول مرة اشوف المدونة بس عجبنى كلامك الله ينور عليك

tarek momen said...

لا... مش جاتكم القرف لأن اول الغيث قطرة ومعظم النار من مستصغر الشرر وانتم يامدونين ويا واقفين احتجاجيا وحاملين لافتات اعتراض .. انتم اول قطرة من الغيثالقادم وانتم مستصغر الشرر الذي سيعقبه نار كاسحة تاتي علي ما صنع فرعون واتباعه ولشان كل ما سبق اقول تاني لأ .... مش جاتكم القرف.....قارئ مستجد للمدونات

Anonymous said...

عبد الله كمال يهاجم الإخوان المسلمين في الفاضية والمليانة ، ومع ذلك تنشر جريدة الراي الكويتية التي يعمل مستشارا لها حوار مع مهدي عاكف يمجد في الإخوان المسلمين ، ولم يفتح عبد الله كمال فمه الذي امتلأ بصرة دنانير طبعا ، مساء الشفافية يا جدول الضرب

Anonymous said...

السلام عليكم ورحمة الله وبركاته
بصراحه دى اول مره اقرأكمية الكلام ال.............فى مدونة الكلام صعب وشويه جارح(لاتؤخذنى) تقول على فافى ومامى يمكن بس برضه الكلام قاسى شويه
عايزة اقولك ان انا زرت مدونه قبل كده وبرضه صاحبها عايز يذكر الكلام اياه بس عمل حساب ""الناس الفافى""واستبدل كل كلمة ب****** ايه رايك افادك الله؟؟
بصراحه لا اعتقد انى حاجى هنا تانى

لي لي said...

الاخ الفنان والفيلسوف برج الحمل
i do not know what to say
اولا كل السيرفرات بتاعة الكومنتات مش شغالة عشان كدة جتلك هنا يا رب تاخد بالك
فيه ايه بقي؟؟؟؟؟؟؟؟؟ يعني شوية وهنشرب كونك سلفيوريك علي كونك نيتريك من طول الغياب
mustafa you cannot go and leaf your readers feel the with drawal symptoms>>yla kol 3am wnta bkheeeeeeeeer ya 7amal

لي لي said...

you know that egypt is awoman dont stop pregnancy and delivery
blodaba2 wlfnaneeen
والفلاسفة امثال حضرتك وانا لا اعرف لما لم اري رواية يتصدرها اسمك حتي الان قلنا ان اسلوبك في الكتابة روعة وفي ناس كتيرة بتكتب اقل منك حصافة وانت عارف هما مين
قد تكون غير متقبل لما اقوله
لكن الكاتب الفنان ده م ع يعني حق للجميع وعايزة اقولك ان دار نشر اسمها ميريت اكيد تعرفها بتنشر للشباب
plz la t7rmna mn ktabtk almarkezya you r athing doesnot look like any thing>>>>>>>>>

ست البيت said...

سلام عليكم ، أول مرة أزور المدونة
حقيقي كلامك شدني خلاني اعرف حقيقة نفسي
فعلا أنا كان نفسي الناس تدخل مدونتي وانشغلت بالكلام دا لفترة
بس لما لقيت مدونتي محدش معبرها زي ما تمنيت
عملت مدونة تانية بس المرة دي كان ليا اهتمام فيها بحق المرأة اللي ضيعوة بتوع حقوق المرأة
كلامك عن اللي في الهم في الهم
صحيح ... ساعات كنت بتحط في مواقف سودة ولما كان حد يقعد يواسيني كنت ابقى مش عاوزاة يمشي واحس قد ايه انه مش حاسس بمشلكتي لأنه مش هو اللي حيتأذى منها
كلام جميل ومدونة جميلة
تقبل تعليقي وتحياتي

لي لي said...

السلام عليكم
ربما انت تشعر
الان بوحدة او
بحزن
او بعدم الرغبة في الكتابة
اسفة جدا لو
كنت بخترق خصوصتك
انت لا تعلم ان هناك
من ينتظرك علي جانب بعيد عنك
==========
ممكن سؤال
لغاية امتي؟؟؟؟؟؟؟؟؟؟
ارجوووووووووووووووووووووووووووك
انت فين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟